Na juhowuchodźe Łužiskeje jězoriny leži gmejna Łaz. Něhdyše brunicowe jamy – dźensniše jězory – a prastare haty wobličo krajiny postajeja. W historiskim jadrje Łaza je Dom Zejlerja a Smolerja. Tu informuje wabjaca a radźena wustajeńca wo lětstotki starych stawiznach wsy a jeje wobydlerjach. Napřećo domej je pomnik Handrija Zejlerja, sławneho serbskeho basnika a myslerja. Cyrkej we Łazu a cyrkwinska murja buštej z kamjenjow z bruneje rudy twarjenej. To je surowizna z wokoliny, kotrejež dobywanje a wuškrěwanje běše do doby brunicy we Łužicy hospodarsce wuznamne.
Třižonjanski jězor je wot 2005 woblubowane kupanišćo. Jězor so rozpřestrěwa na 286 ha a leži direktnje sewjernje statneje dróhi 108 wot Wojerec na Nisku. Dwaj přibrjohaj – pod Łazowskej škleńčanej pyramidu a blisko Běłeho Chołmca – ke kupanju a wočerstwjenju přeprošujetej. Na přibrjoze w Běłym Chołmcu je městno za caravany. Lubowarjam přirody a wodosporta so tam šěroki wid na jězor wotwěra. Wusahowaceje kwality wody a wjele družin rybow dla je Třižonjanski jězor tež raj za wudźerjow.
Jězor nasta z brunicoweje jamy Tři Žony, z kotrejež mjez 1984 a 1989 něhdźe 14 milionow tonow wuhla dobywachu. Dwaj statokaj serbskeje wsy Tři Žony buštej tomu woprowanej. Pławjenje prózdneje jamy započa so 1996 a bě 2001 dokónčene. Zo bu pohórnistwowa krajna „Łaz II“ do biosferoweho rezerwata Hornjołužiska hola a haty zapřijata, je jónkrótna wěc.
Škleńčana pyramida na Łazowskim přibrjoze je na kóždy pad wopyta hódna. Dožiwjenska gastronomija přeprošuje k přijomnemu přebywanju, a dźěći smědźa drjewjanu łódź piratow wobsadźić.
Štóž chce při Třižonjanskim jězoru sportowsce aktiwny być, móže so na wosom kilometrow dołhi a kompletnje asfaltowany kołopuć podać. Čara je idealna za swójbny wulět na kole, za pućowanje abo skatowanje. Štóž ma lóšt na tróšku rozwólniše jězdźenje, njech so na kart-čaru we Łazu poda.